行程規劃 October with BTS World Tour: Roma, Berlin , München, Florence

我承認我係癲嘅,我係丫我認。自從上一次係大阪買到防彈德國場演唱會飛後,就可以完全證實我患有嚴重防彈少年團上癮症。其實只係想見呢七條仔一面,但韓國場真係好難買,但又唔可以唔見,所以要逼住我坐飛機去歐洲⋯⋯ 追佢地真係辛苦丫……

回歸原點,今次主菜係假於柏林 BTS WORLD TOUR ‘LOVE YOURSELF’ 2018,但唔知點解十月去柏林嘅機票超級貴,所以只可以去周邊國家然後再飛過去。

係Skyscanner睇左足足兩個月,價錢最平嘅只有坐國航去羅馬/華沙。老實講,根本三個城市我都好唔中意,特別係華沙,個個人塊面都好似死左老豆咁黑;羅馬唔洗講,一個混亂嘅城市、九個巴士站用同一個名、扒手多治安差,簡直係一個犯罪嘅天堂;柏林……純粹因為我崇尚西德^_^; 最後因爲意大利國土加持所以選擇左罪惡之城羅馬。

買機票當時,我當然唔知道原來國航嘅飛機師會係飛機裹面食煙,所以買左????‍♀️由香港岀發去北京,再由北京轉機去羅馬,價錢只係HKD3,4XX。真心好平,買完一剎那就好似執到金一樣,同時希望我地班機冇人會係機艙食煙……

Day 1 Roma

到達羅馬嘅時間應該係晚上八點。由羅馬岀機場有兩個選擇:一係坐巴士,一係坐地鐵,但因為經歷過九站同名後,我應該會選擇坐地鐵。住宿:係羅馬火車總站嘅一間Hostel,評分奇低但勝在價錢夠平,一晚大概百幾蚊港幣跳樓價。我地只為左有個地方放行李,夜晚放個人,所以係上佳嘅選擇。晚餐我都諗好,就係去食鬥獸場外面嘅kebab,睇到夜景又食到平野,幾好~

Day 2 Roma

市內交通係一個大問題,但我當然有旁門左道可以解決,呢個你就要等睇我10月點做啦(^_^)v 隨便行下諸神廟,許願池,古羅馬遺跡咁啦,最重要當然去買草意大利終於開放娛樂用大麻,只要度數唔高過0.6就任你買任你食,令意大利呢個國家更接近天堂!

Day 3 Roma

市內交通 – 去梵帝崗:四年前我因爲係主日去,所以梵帝崗博物館冇開,今次一定要去左先離開!玩到四點就返羅馬、夜晚九點機上柏林,聽說Ryan Air上星期又岀事故。唉唔X驚!嚇唔到我嘅!晚上十一點到垃圾首都。

歐洲廉價航空係迷一般嘅存在,Ryan Air 同 EasyJet 嘅價格更加係迷中之迷。分享一下上年我買機票嘅經驗,3/2017我係Ryan Air買左張由Malta返Trapani嘅機票,特價12歐一個人。係丫你冇睇錯,係當時港幣100蚊,但我個行李竟然要收我18歐,即代表我平過個行李????‍♀️

而今次上柏林,我首先做左一個好錯嘅决定,就係見到特價冇即時買⋯⋯其實Ryan Air特價係有季節性,以我所知每年3月6月7月都會有特價,所以上年去Trapani程飛機係特價(但呢個航線好似已經冇左);而今年3月,我係rome8rio睇到飛柏林、星期一早上八點幾果班機係港幣200幾蚊⋯⋯但我冇及時買⋯⋯一個星期後個價位就立即跳返上700幾蚊而且再冇做特價⋯⋯果下我真係後悔到跳樓⋯⋯所以唯有坐夜晚九點果班機,其實唔係錢嘅問題反而係擔心去到柏林排唔切演唱會條隊入場咋(;´༎ຶД༎ຶ`)

Day 4-5 Berlin

呢兩日冇行程可言,就係排隊等入場排隊等買Goods⋯⋯你當我冇去過柏林旅行啦!

今次場館 - Mercedes-Benz Arena Berlin 坐落於Warschauer Straße、柏林圍牆附近,咁當去左一個景點啦????‍♀️

Day 6 München

一個任性嘅行程-返München。每次去歐洲都要返一返去,雖然今次冇時間見任何朋友但都想返去飲杯啤酒食隻豬手買排朱古力。

以前由Berlin落München我地會坐通宵Flixbus,夜晚十一點坐到第二朝七點。本身都諗住咁樣做,但我又屎忽痕想望下DB BAHN有冇平嘅機會,點知真係有 從來冇諗過有機會坐ICE(全歐最快火車)落München,但原來早買係可以夢想成真。早上0534由 Berlin HBF. (tief)(tief係地下月台,所有遠程火車都係地下月台開岀),0850到Nürnberg HBF. 轉車,1007到München HBF. 先係19.9歐,唔使捱巴士坐通頂,一流!

今次一回有幾件事做,(1)買筆買紙;(2)食TEA;(3)買朱古力; and (4)食 Augustiner。

然後同一日坐Flixbus落Florence。 我知道呢排有新聞話Flixbus比人夾硬開行李門搶行李,坐巴士好似好危險咁,但其實唔關巴士事,地方先係問題。巴黎本身就係一個超級危險嘅城市,一啲都唔浪漫,如果你要係巴黎同我求婚係一定唔會應承????‍♀️ 治安太亂太多窮人,佢地窮起上黎真係會明搶,所以可以唔去巴黎就唔好去啦。在此要為Fixbus平反。

係啦,我地係會超任性即日落Florence,夜晚 München ZOB 十點巴士,第二早六點鐘就到Florence,慳左住宿費仲落得返意大利真係不得了。

Day 7-8 Florence

Florence我真係未去過,而聽聞呢度最岀名就係羅白歐與朱麗葉同Outlet,呢兩日都係舒舒服服咁行下睇下野。

原日 Day 8 就要落返羅馬返香港

我地會係Florence坐四點火車到羅馬火車站,再去羅馬FCO機場去北京,第二日就由北京返香港,完成我地9日追BTS之旅。

老實講,其實我睇見都覺得好累(;´༎ຶД༎ຶ`)

但好彩我地後生嘛,故事詳情,就等十月睇我嘅Blog Live啦

發表評論

Item added to cart.
0 items - 澳門元MOP0.0